Қазақстан Республикасы Ғылым және жоғары білім министрлігі ұйымдастыратын жыл сайынғы «Үздік ғылыми қызметкер» конкурсының қорытындысы бойынша «Қазақстан инжиниринг» R&D орталығы» ЖШС Бас директоры Ғ.Н. Байсейітов жеңімпаз деп танылды.
Сыйлық табыстау «Ғылым және технологиялық саясат туралы» Қазақстан Республикасының 2024 жылғы 1 шілдедегі № 103-VIII ҚРЗ Заңы шеңберінде өтеді әрі ғылымды қолдау мен жас ғалымдар мен зерттеушілерді жаңа жетістіктерге ынталандыру жолындағы маңызды қадам болып табылады.
«Ғылымды дамыту – еліміз үшін стратегиялық маңызы бар басымдық. Әсіресе дарынды, қабілетті жастардың ғылыммен айналысуына жағдай жасау өте маңызды. Отандық өнеркәсіп үшін маман даярлау ісі – өте өзекті мәселе. Жалпы, мемлекет, ғылыми қоғамдастық және бизнес арасындағы жасампаз серіктестік отандық ғылымды өрге сүйрейтін негізгі шарт екеніне сенімдімін»,-деп өз сөзінде ҚР Президенті Қасым-Жомарт Тоқаев айтып өткен.
Жетекші сарапшылар мен ғалымдардан тұратын Республикалық конкурстық комиссия 50 лауреатты анықтады. Жеңімпаздар:
- ғылыми-зерттеу институттарының;
- жоғары оқу орындарының;
- әр түрлі саладағы ұйымдардың ғылыми бөлімшелерінің өкілдері болды.
Бірінші кезекте сыйлық ғылым мен технологияларды дамытуға белсенді қатысатын ғалымдарды қолдауға, қолданбалы және теориялық маңызы бар зерттеу қызметін көтермелеуге, сондай-ақ Қазақстанның әлеуметтік-экономикалық дамуына ықпал ететін ғылыми жетістіктерді тануға бағытталған.
«Үздік ғылыми қызметкер» сыйлығын беру Қазақстанның ғылыми және технологиялық әлеуетін нығайту бөлігінде «Қазақстан инжиниринг» R&D орталығы» ЖШС жұмысының маңыздылығын атап көрсетеді. Сыйлықпен марапатау тек жетістіктерді мойындаумен шектелмей, елдің қорғаныс қабілетін арттыруға және өнеркәсіпке инновациялық шешімдерді енгізуге бағытталған келешек әзірлемелер дайындауға ынталандырады.